Leiho eta balkoiak apaintzeko lehiaketa deitu du Udalak

Aurten ere, hirugarrenez jarraian, Balkoi eta Leihoak Lorez eta Landarez Apaintzeko Lehiaketa antolatu du Bergarako udalak. Parte hartzeko izen-ematea ekainaren 1etik 17ra bitartean egin daiteke Udal liburutegian (08:30-20:30 edo 943-77 91 58). Uztailaren 6ko Eguazteneko Azokan izango da sari banaketa, Oxirondon, 19:00etan. Lehenengo saria 400 € izango dira Bergarako dendetan gastatzeko bonutan; bigarrena, berriz, 200 euro.

1. Helburua

Deialdi honen helburua balkoiak eta leihoak zaintzea eta hauek apaintzen jarraitzeko ohitura berreskuratzea da, baita ere apainketak ingurugiroari eta herriaren itxurari ekartzen dizkion onurak balioan jartzea.

2. Parte-hartzaileak

Lehiaketan Bergaran dauden etxebizitzen jabe edo errentariek parte hartu dezakete. Leiho eta balkoi hauek apainduta egoteaz gain ezin diote inolako arriskurik sortu oinezkoei.
Balkoiek gutxienez ekainaren 17tik uztailaren 30era egon beharko dute apainduta (biak barne). Parte-hartzaileek, tarte honetan, lehiaketara aurkezten den leiho edo/eta balkoiari argazkiak ateratzeko baimena ematen diote Udalari.

3. Izen-ematea

Izena emateko, eranskina bete eta Bergarako Liburutegian aurkeztu beharko da ekainaren 17a baino lehen. Parte hartzen duen leiho/balkoi bakoitzari zenbakidun ikur bat banatuko zaio, eta ikur hau leiho/balkoian ikusgai egon beharko da.

4. Lehiaketa

Leiho/balkoiak apaintzeko elementuak parte-hartzaileen esku utziko dira, beti ere pasabideak, espaloiak eta inguruko bizilagunen etxebizitzen inguruak errespetatuz. Eskegita dagoen edozein elementu ondo lotuta egon beharko da, haizeagatik istripu arriskuak ekiditeko.

5. Epaimahaia

Udalak epaimahaia izendatuko du, eta epaimahaiaren osaketa, sari banaketa egunean argituko da. Epaimahaiak, behar besteko maila ez dagoela irizten badu, lehiaketa irabazle gabe utz dezake. Epaimahaiak erabakitakoa apelaezina izango da, lehiaketa honetako parte hartzaileek onartu egin beharko dituzte oinarri hauek eta baita epaimahaiaren erabakia.

6. Balorazio irizpideak

Lehiaketa honetan ondorengo irizpideak baloratuko dira: originaltasuna, apainketaren kalitatea, loren iraunkortasuna eta diseinu floristikoa. Horrez gain, egitura moduan berrerabilitako materiala erabiltzea ere baloratuko da.

7. Sariak

Sari banaketa uztaileko Hileko Lehen Eguazteneko Azokan izango da Oxirondon, uztailak 6an, arratsaldeko 19:00etan.

Sariak ondorengoak izango dira:

  • 1. saria: 400€ (Bergarako dendetan gastatzeko bonuak)

  • 2. saria: 200€ (Bergarako dendetan gastatzeko bonuak)

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.