Bergaran, Domeka Azoka izan da gaur, eta eguraldi ona aprobetxatuz giro bikaina izan da San Martin plazan. Elkartrukea, berrerabilera, eta artisautza sustatzeko postu ezberdin ugari jarri dituzte bertan; herritarrek, zein kanpotik etorritako saltzaileek. Askok etxeko ganbaran, edo garajean dituzten gauzak eroan dituzte, beste batzuk aldiz, eurek egindako erropak, objektuak, oroigarriak…
Guztira, 40 postu inguru izan dira, bigarren eskuko produktuena erdiak, eta beste erdia berriz, artisauena. Bigarren eskuko produktuen artean: arropa, bitxiak, haurrentzako jostailuak, haurrentzako erropak, oinetakoak, osagarriak, liburuak, loreak… izan dira, eta artisauen postuetan berriz: larrua, arkatzak eta koadernoak, bitxiak, haurrentzako osagarriak, euskal panpinak, makramea… bezalakoak.
Saltzaileak pozik
Saltzaileen artean, mota guztikoak izan dira; lehen aldiz postu baten aurrean jarri direnak, eta beste batzuk aldiz, azokaz-azoka, askotan ibiltzen direnak. Giro ederra izan da bertan, eta asko edo gutxi saldu pozik geratu dira saltzaileak.
