Ohiz kanpoko gailuak egon dira ikusgai, zapatuan, Bergarako frontoian. Robotika azoka egin dute eta drone modeloen erakustaldiak harrera ona izan du. Drona, gidari gabeko aireko sistema da. Gaur egun, erabilera ezberdinak ditu eta epe laburrean lortutako ospearen ondorioz, etorkizunerako ere erronka ugari izatea aurreikusten da. Teknologi hori zertan den eta gailu horiek zertarako gauza diren erakutsi zuten hainbat lagunek, zapatuan, Bergarako robotika azokan.
Zientzia, Teknologia eta Berrikuntza Jardunaldien barruan geocaching ikastaroa eta Practice your music izeneko software-aren erakustaldia ere egin dituzte Bergaran. Laboratoriumen eta Aroztegi aretoan, hurrenez hurren.
Astean ekintza gehiago
Prozesu industrialen monitorizazioari buruzko saioa egingo dute martitzenean Miguel Altunan; barnetegi teknologikoa, eguaztenean, Lasan; pintxo-wifi-a eguenean; eta merkatarientzako eta herritarrentzako formazio saioak egingo dituzte aste osoan.