Osintxuko ama-seme dantzariak "oso pozik" Segurako txapelketatik bueltan

Euskal Herriko 39. dantza txapelketa jokatu zuten pasa den zapatuan Seguran. Bertan, Osintxuko ordezkaritza izan zen, Amaia Agirre eta Manex Alberdik osatutako bikotea, hain zuzen. Ama-semeak dira Agirre eta Alberdi, eta lehen aldiz aurkeztu dira bikote bezala txapelketara.

 

Guztira hamahiru bikotek hartu zuten parte, eta osintxuarrek seigarren egin zuten bukaerako klasifikazioan. Egindakoarekin "oso pozik" geratu direla esan du amak.

Agirre duela hamar urte inguru hasi zen Osintxuko dantza taldean umeen irakasle gisa, eta urte ugari daramatza mundu horretan. Birritan irabazi du txapela, 1984an eta 1986an, Juantxo Urbietarekin bikotea osatuta.

Alberdi, berriz, 5 urterekin hasi zen dantzan, amak irakatsita. Euskal dantzaz gain, balleta ere egiten du, Bilbon.
Agirrek azaldu duenez, Segurara joan ohi dira urtero txapelketa ikustera, eta ekainean bikote moduan apuntatzea erabaki zuten. Ez du uste datorren urtean berak berriro parte hartuko duenik, baina "ikusi egin beharko da", dio. Zapatukoa zerbait "berria eta oso polita" izan zela dio.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.