Arratsaldeko seiak eta erdietan irten dira neska-mutikoak Udal Biltegitik. Lau eta hamaika urte bitarteko ume eta gaztetxoak hartu dute parte gaurko San Martin eguneko danborradan.
Nagusiek baino zertxobait motzagoa izan da haurrek burutu duten ibilbidea: Kultura etxea, Arruriaga, Masterreka, Bideberri, Fraiskozuri, Herrilagunak, Domingo Irala, Irizar eta Barrenkale kaleetatik pasatu dira, eta San Martin plazan amaitu dute. Bertan, gazte bandaren laguntzaz jo dute beste behin ere San Martin martxa, eta banderadunak Udaletxeko balkoira igo dira haien banderak astintzera. Txalo zaparrada eskaini diete guztiei bertan bildutako ikusleek.
Txokolatada
Danborradaren amaieran, berotuta eta nekatuta zeuden haurretako asko, baina, sari modura, txokolatada izan dute Udaletxeko arkupetan.
