Bergararra izango da taularatze horretako zuzendari artistikoa eta bera arduratuko da eszenografia diseinatzeaz ere, Alex Odriozola herrikidearekin batera. Donostiako Opus Lirica konpainiak maiatzean deitu zuen lehiaketa eta, hiru finalisten artean, euren proposamena aukeratu du. Lau hilabete izango dituzte eszenografia prestatzeko eta, ostean, hamar egun Donostian guztia muntatzeko. Estreinaldia 2016ko otsailean izango da, Kursaalen.
Lehiaketa irabazi dutela jakin berritan, poztasuna azaldu dio Moñuxek Goienari. Proposamenaren gainean ezer gutxi argitu du, baina, oraingoz; Opus Liricak ez zituela proposamen "abstraktuegiak" nahi eta, oinarriek eskatzen zuten bezala, "parametro klasikoetan" dagoela besterik ez.
"Oso talde ona"
Valen Moñux eta Alex Odriozola ohiko lankideak dira; bien artean egin zituzten Peter Pan eta Olentzero & Co. musikalak eta Mozkorra parregarri opera; San Martinen estanpan eta errepresentazioan ere biak aritu dira, eta Bergarako Musika Eskolako zenbait lanetan ere bai. "Oso talde ona" osatzen dutela dio Moñuxek.
