40 lagun pasa elkartuko dira bihar (barikua) Ozaeta-Labegaraieta-Zubiaurre inguruan

San Martzialgo igoerako taldea.

50. aldiz (eta hori ez da samur esaten) eutsiko dio Bergarako Ozaeta-Labegaraieta-Zubiaurre inguruko lagun talde batek abuztuan urtero-urtero zaindu izan duten ohiturari: lagun artean elkartu (San Martzialen), bolotan jokatu, bazkaria egin… eta eguna bapo pasatu. Aurten, parte-hartzaile batzuen adina aintzat hartuta, erabaki dute Ozaetan bazkalduko dutela. Bestalde, ekimenaren 50. urteurrenaren harira, oroigarri bana jasoko dute guztiek.

"Azken urteotan gero eta gutxiagok parte hartzen genuen, iaz 20 batek edo. Baina aurten, 50. urteurrena dela-eta, 40-42 bat lagun izango gara"; pozik eman du datua Iñaki Arregik, biharko ekimenaren antolatzaileetako batek.

Txarrantxan, bazkaria

Egitarau mardula prestatu dute ospakizunerako: San Martzialen hasiko dute eguna, 11:00etan, erromeria eta bolo-jokoarekin. "Bergarako leku estimatua da, garai honetan baketsua izaten da, eta horregatik egin izan dugu bertan", esplikatu du Iñaki Arregik.

Hala, bertan eurek egindako pintxoak-eta jan ondoren, Ozaeta auzora jaitsiko dira. "Batzuk adinean aurrera doaz, eta San Martzial ibiltzeko trakets samarra da, horregatik aurten aukera izango dute ospakizun nagusia auzoan egiteko", azaldu du Arregik.

Han, Ozaetan, 13:00etan dute lehen hitzordua, Aitorren zelaian argazkia ateratzeko. Txikiteoa egiteko asmoa dute ondoren, "auzoko Josu soinujoleak" lagunduta, eta 14:30ak aldera bazkalduko dute, Txarrantxan. Han ere musika eta bestelako animazioren bat izango dituzte.

Kartetan eta txikiteoan

Karta-jokoa arratsalde parterako laga dute, 17:30erako; izan ere, auzoko gainontzeko koadrilek 19:30ean duten txikiteorako ohiturarekin bat egin gura dute eurek ere, "txikiteo umoretsua" eginez. Bukatu, berriz, 21:00etan bukatuko dute jaialdia.

Parte hartuko duten guztiak, hori bai, gizonak dira: "Gure aldetik ez dago emakumeendako trabarik, baina badakizu, orain dela 50 urte, elkarteetan-eta, emakumeek aukera gutxi izaten zuten, eta…", esplikatu du Arregik.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.