Gaur egin dituzte Angiozarren auzoko alkatea eta beste hamasei batzarkide aukeratzeko hauteskundeak. 250 pertsona inguru zeuden botoa ematera deituak, eta parte-hartzea %60ren bueltan egon dela adierazi du Josen Anjel Mikeo, egungo alkateak: "Akaso beste hauteskunde batzuetan apur bat gehiago izan da parte-hartzea, baina antzera xamar ibili da. Bestela, eguna bera oso ondo joan da, arazo barik".
Botoa eman dutenek lau auzotar proposatu behar izan dituzte denera: bat alkate izateko, eta hiru batzarkide izateko. Jose Anjel Mikeok aurreratu duenez, alkate izateko dozena bat izen proposatu dituzte, eta batzarkide izateko 60 inguru. "Kontrakoa eman dezakeen arren, uste dugu oso positiboa dela jende askoren izenak agertzea, esan gura duelako auzotarrek 60 pertsona behintzat gai ikusten dituztela gauzak aurrera eroateko", adierazi du egungo alkateak. Dena den, alkate izateko izan bat nabarmendu dela ere aurreratu du.
Batzarra bihar, astelehena
Hauteskundeen emaitzak bihar emango dituzte jakitera, 20:00etan Ardiaska aretoan egingo duten batzarrean. Boto gehien jaso dituztenek orduan esango dute batzarkide izatea onartzen dute edo ez. Ohiturari jarraituz, San Migel egunaren, irailaren 29aren bueltan egingo dute hurrengo lau urtetan alkate izango dena izendatzeko ekitaldi ofiziala.