Kirol elkarteetan ez ohikoa dena gertatu da aurten Bergara Kirol Elkartean. Berau zuzentzeko hautagaitza bat baino gehiago egotea. Ohikoa izaten da inork ez nahi izatea ardura hori hartzea. Ez da BKEren kasua, une honetan. Bi hautagaitza elkartea gidatzeko, honenbestez eta, aukeraketa, hautestontzietan: Pedro Ricorena, batetik; Eloy Cresporena, bestetik; BKEko futbol talde nagusiko jokalari eta kapitainarena. Lehenengoa garaile.
626 lagunek zuten botoa emateko eskubidea, elkarteko bazkide eta jokalari federatuen artean. %30eko parte hartzea. 202 lagun hurbildu ziren Irizar jauregiko hauteslekura.
"Kirolarien formazio integrala"
Orain arteko presidenteak bere hautagaitzan jende "berria" egotea azpimarratu du, "ideien berritzerako berme" dela esanez; egungo taldetik berak bakarrik jarraitzen du, nahiz eta lehenago zuzendaritzan jardundako jendea baduen lagun, Iñigo Zaitegi, "Bergarak izan duen presidente onenetakoa", tartean.
Kirol arloan, Manu Diazek eta Enrike Nietok, "talde nagusiak azken bi igoeretan izan zituen entrenatzaileek", hartuko lukete ardura, "prestatu duten eta denon konfiantza duen proiektua garatzeko". "Arrakasta izan duten ereduak" jarraituta egin dutela dio.
"Emakumezkoen futbola garatzeko plana" egitea, berriz, Iñaki Lazkanoren egitekoa litzateke. Ororen gainetik, baina, "kirolarien formazio integrala" izango dute helburu: "Balioen sustapena gakoa izango da". "Geroago eta kirolari gehiago" dituztela eta azkenaldiko kirol emaitzak, "oro har, oso onak" izan direla dio Ricok, "nahiz eta futbol talde nagusia jaitsi".
Agorrosin eta Ipintza "birmoldatu" beharraz dihardu, egungo instalazioak ez direlako nahikoa eta "zahartuta" daudelako. Saskibaloi, eskubaloi eta pilota sailekin "elkarlana" nahi dute, "autonomia errespetatuz".