Solstizio jaia egingo dute plazan urteko gaurik motzenean

Urtero bezala, San Juan sua egingo dute aurten ere Bergarako San Martin plazan, herri mugimenduaren Xaxau konpartsak antolatuta. Egun osoan, jendeak erre nahi dituen gauzak utzi ahal izango ditu plazaren erdian horretarako prestatuko duten puntuan. Gero, gauean, bertan bildutako material guztiarekin su handia piztuko dute.

22:30ean hasiko da jaialdia. Ohi bezala, suaren bueltan sorgin-dantza egingo dute, herriko txistularien musikaz lagunduta eta mozorro eta guzti.  

San Juan gauarekin zerikusia duen ipuin bat kontatuko dute, eta udaletxeko balkoitik txotxongiloek bizia emango diote. Oxirondoko ludotekako umeen zenbait gurasoren laguntza izan dute ekintza hori antolatzeko. Bukatzeko, trikitilari eta pandero-joleek bizpahiru pieza jo eta abestuko dituzte.

Sorgin-dantzarako entsegua

Martitzenean, ekainak 23, sorgin-dantzan parte hartu nahi dutenentzat entsegua egingo dute gaztetxean arratsaldeko seietan. Nahi duenak Arrano tabernan eman dezake izena, baina apuntatu gabe ere edonor joan daiteke, Xaxautik azaldu dutenez. 23 gauean ahalik eta jende gehien biltzea nahi dute antolatzaileek. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.