Bergarako Udalak eta Olaso Fundazioak Olaso Dorreko lorategiaren irekiera ekitaldi ofiziala egingo dute domekan. Lorategia maiatzaren 9tik zabalik egon da, baina domekan, goizeko 11:30ean egingo da irekiera ofiziala.
Egokitzapen eta atontze lanen helburua lorategiaren jatorrizko diseinua berreskuratzea izan da. Bergarako Udaleko hainbat sail elkarlanean-lorezaintza zerbitzua eta artxiboa, nagusiki-, lorategiaren gaineko ikerketa egiten ari dira lorategiak sorreran zituen diseinua eta itxura berreskuratzeko eta, aldi berean, Eusko Jaurlaritzak aparteko zuhaitz izendatu zuen magnoliaren biziraupena bermatzeko.
Balio handiko ondarea
Lorategian, ondare natural eta kulturalaren parte diren hiru elementu esanguratsu daude ikusgai.
Jesusen Lagundiaren Armarria: Errege Mintegia Jesuiten eskola zen garaikoa eta
1767an kanporatuak izan zirenean fatxadatik kendutakoa. XVII eta XVIII. mendeetako
Jesusen Lagundiaren ikastetxetik gelditzen den arrasto aberatsena.
Armarri Heraldikoa: XVII. mendearen azken bukaera aldekoa, barroko garaikoa,
Jesuiten armarriaren gainean kokatuta dago.
Magnolia zuhaitza: Lorategiaren bukaeran kokatuta, Eusko Jaurlaritzak aparteko
zuhaitz izendatu zuen 1995ean eta ofizialki babestuta dago.