Bergarako errolda osatzen duten 14.757 bizilagunetatik 11.625ek izan dute gaur botoa emateko aukera, udalbatza berria osatuko duten hamazazpi hautetsiak aukeratzeko. Alkategaiak bost dira: Agurne Barruso (EH Bildu), Juanje Alberdi (EAJ), Mari Carmen Barrenetxea (PSE-EE), Aiert Lizarralde (Irabazi) eta Luis Antonio Lastra (PP).
Ikusteko, beraz, nork ordezkatuko duen Jaione Isazelaia (Bildu) eta nola banatuta geratzen den udalbatza. Erreferentzia gisa, azken lau urteotan bederatzi hautetsi izan dira Bildukoak (3.608 boto), bi Aralarrekoak (748) –ez ziren batera aurkeztu, baina Udal Gobernua osatu zuten batera; oraingoan batera joan dira, EH Bildun–, bost EAJkoak (2.108) eta bat PSE-EEkoa (627).
