'Hiri asko bere baitan' ikuskizuna' eta film laburrak kartzela zaharrean

Argazki eta bideo proiekzioak, musika eta antzerkia batzen dituen diziplina askotariko ikuskizuna da Hiri asko bere baitan. "Ikusleei unibertso bisual, literario eta soinudun berezian murgiltzeko aukera eskaintzen diegu, herrietan eta hirietan ezkutuan dauden askotariko istorioak elkarrekin josita", adierazi du Asier Olabarrietak, egitasmoaren bultzatzaileak.

Bihar, egubakoitza, Bergarako gaztetxean eskainiko dute, 22:00etan, Egubakoitzak teilatupian egitarauaren barruan. Euria eginez gero, kartzelako patioan beharrean gaztetxe barruan izango da saioa. Sarrerak hiru euroren truke eskura daitezke.

Lehiaketa baterako sortua

Bilboko Udalak antolatzen duen Ideiak martxan lehiaketan du ikuskizunak abiapuntua: "Abesti, erakusketa eta bestelakoekin irabazi genuen lehiaketa, eta martxoan estreinatu genuen horien guztien batura den 50 minutuko zuzeneko ikuskizuna".

Lau lagun dira taularen gainean, horien artean bi debagoiendar: Kepa Errasti aktore aretxabaletarra eta Aitzol Muxika musikari bergararra: "Kepak bakardadeari, maitasunari eta hirien eraldaketari buruzko istorioak kontatuko ditu, eta baita abestu ere; eta Aitzolek baxua eta tronboia joko du".

Ikuskizunaren ondoren, film laburren emanaldia egingo dute gaztetxeko Asanbladakoek.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.