Aritzeta abesbatzakoak 2013an izan ziren Katalunian abesten, eta asteburu honetan Orfeo de Sabadellekoak izango dira bisita bueltatu eta Bergaran kantatuko dutenak. Hala, bihar, zapatua, 20:00etan, kontzertua eskainiko dute kataluniarrek udaletxeko osoko bilkuren aretoan.
Hamasei doinu
1904an sortutako taldea izanda, ibilbide luzea du Orfeó de Sabadellek, eta Bergarakoa izango da Euskal Herrian eskainiko duten kontzertu bakarra. Francesc d’Assis Pagesen zuzendaritzapean hamasei pieza abestuko dituzte zapatuan. Prestatu duten programari dagokionez, besteak beste, J.S. Bachen, Franz Schuberten eta Johannes Brahmsen doinuak abestuko dituzte, baina baita hainbat doinu kataluniar ere. Non abestuko duten kontuan hartuta gainera, euskal musikari ere egingo diote keinurik.
