Datorren astean estreinatuko dute Egubakoitzak teilatupian, eta, orain arte moduan, Kartzela Zaharreko patioa kandelekin eta faroltxoekin apainduko dute.
Gaztetxean bakarrizketa saioak egin izan dituen Aitor Navarrok zuzentzen duen DKdencias taldeak zabalduko du egitaraua. "Lan berria da; ez da, baina, umorezkoa. Hurrengoan, argazkigintza, literatura eta musika uztartzen dituen ikuskizuna izango dugu hasteko, eta film laburren emanaldia ondoren. Hirugarrenean, herriko jaiak izango direnez, salto egingo dugu, eta azkenekoan, Txapa Irratiak antolatu duen helduentzako ipuin saioa egingo du Amaia Arriaran bergararrak. 22:00etan eta hiru euroren truke izango dira guztiak", azaldu du Ainhoa Narbaitzak, gaztetxeko kideak, eta zera gaineratu: "Ekainean hamabosgarren urteurrena ospatuko dugu, eta motorrak berotzeko datoz maiatzerako antolatutakoak. Askotariko eragileekin egitarau oparoa ari gara prestatzen".
