Alai taldeko kideak, baina, ez dira San Pedron bakarrik egongo, Bergarako Orkestra Sinfonikoko hari-taldeak ere emanaldia egingo du-eta. "Nork bere emanaldia egingo du, baina sorpresatxo bat prestatzen ari gara", aurreratu du Alai taldeko kide Aitor Erañak.
Abesti ezagunak
Alai taldeak irekiko du biharko errezitaldia. Denera, ezagunak eta herrikoiak diren hamalau abesti kantatuko dituzte. Haien ostean, Orkestra Sinfonikoko hari-taldeak Alfredo Gonzalez Chirlaqueren eta Benito Lertxundiren partitura ezagunak joko ditu.
Kontzertu bikoitz horretarako sarrerak 5 eurotan salduko dituzte parrokian bertan, eta batutako dirua San Pedron dagoen Stoltz-Freres organoa konpontzera bideratuko dute.
