Liburutegiko zerbitzu erabilienak beheko solairura eroango dituzte

Kultura zerbitzuko langileak udaletxera lekualdatuko dituzte.

Kultura Zerbitzuak beheko solairuan duen bulegoa udaletxera eroango dute liburutegiari lekua egiteko. Irisgarritasuna aintzat hartuta egingo dituzte aldaketok. Asteon hasi dituzte lanak eta eta apiril bukaerarako amaituta egotea espero dute. Lanok, dena den, ez dute eragingo liburutegiaren ohiko funtzionamenduan. 

"Asmoa da herritar guztiendako irisgarria izatea liburutegia", dio Leire Iruin Bergarako Kultura zinegotziak. Hala, gehien erabiltzen diren zerbitzuak jarriko dituzte beheko solairuan: azkeneko hiru urteetako nobelak, hemeroteka, filmak, egunkariak irakurtzeko gunea eta ordenagailuen gunea. "Bestelako zerbitzuak, entziklopediak, adibidez, goian egongo dira", azaldu du Iruinek. Oinarrizko zerbitzuak "denen eskura" egotea da asmoa. 

Hausnarketa baten ondorioa 

"Hausnarketa bat egin genuen eta konturatu ginen liburutegiak ez zuela bermatzen irisgarritasuna", dio zinegotziak. Irisgarritasuna bermatzeko aukera ondoko hau zela ikusi zuten: orain arte beheko solairuan lan egin izan duten Kultura Zerbitzuko langileak Udaletxera lekualdatzea, eta euren tokian jartzea gehien erabiltzen diren liburutegiko zerbitzuak. 

Beheko solairu hori irisgarri izateko, gainera, hainbat lan egin behar izan dituzte kultura etxean: sarrera nagusiaren albo batean arrapala bat jarri dute eta hainbat ate egokitu egin behar izan dituzte.

Apirilerako lanak amaituta 

"Aste Santuaren bueltan hainbat zerbitzu jada beheko solairuan egongo dira, eta espero dugu apiril amaierarako lan guztiak amaituta egotea", dio Iruinek. 

Lekualdaketa egiteak ez du aparteko eraginik izango liburutegiko erabiltzaileengan; hala ere, egun horietan ohi baino zarata handiagoa egongo da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.