Bubisher elkarteak aurreko urtean baino tona bat janari gehiago jaso du

Bubisher elkarteak 5.209 kilo janari batu ditu SOS Sahara Karabanarako. Bergaran, Antzuolan, Soraluzen eta Elgetan egin dute janari bilketa. Herriz herri hauek dira datuak: Bergaran 4.360 kilo janari batu dituzte; Antzuolan, 612; Soraluzen, 205; eta Elgetan, 32.

"Elkartetik oso balorazio positiboa egiten dugu, murgilduta gauden krisi garai hauetan 1.000 kilo gehiago jasotzea oso albiste  pozgarria da", dio Bubisher elkarteko kide Bibi Anduezak.

Lekaleak eta arroza

Batutako bost tona horietatik bi arroza eta lekaleak dira. Janariak, orain, bi hilabete luzeko bidea egingo du. "Alacanteraino kamioian eroango dute janaria, han itsasontzi batean sartu eta Oranera iritsiko da. Aljeria osoa kamioiz zeharkatu eta gero iritsiko da janaria kanpamentuetara", argitu du Anduezak.

Bubisher elkarteko kideak argi dauka herri sahararrak jasaten duen "muturreko egoera" arintzeko edozein esfortzuk balio handia duela.

Horregatik, Bubisher elkarteak eskerrak eman nahi dizkie hori ahalbidetzeko parte hartu duten guztiei: Bergarako eta Antzuolako udalei; Antzuolako, Bergarako, Elgetako eta Soraluzeko Lehen Hezkuntzako ikastetxeei; Aranzadi Ikastolari; Mariaren Lagundia Ikastolari; Ipintzako eta Soraluzeko institutuei; janari-dendei; Komite Internazionalistari; Antzuolako Anelkar elkarteari; Embalan 3 enpresari; eta DHL garraio enpresari.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.