Inoiz baino gutun gehiago jaso dituzte edizio honetan, denera, 87, eta horietatik lau izan dira sarituak. Epaimahaikide izan den Maite Toledok adierazi du lan sarituak hasieratik nabarmendu zirela, baina orokorrean egon den maila ere azpimarratu du: "Gustura irakurri ditut lan guztiak, oso ondo idatzita zeuden".
Lehenengo saria Burlatako Josune de Goñik irabazi du, eta bigarren saria ere Nafarroara joan da, Elizondoko Fernando Anbustegirentzat. Bergarar onenaren saria Maddi Elortzak lortu du, eta 26 urtez azpikoek idatzitako gutunen artean Leire Urretabizkaia ikaztegietarrarena izan da onena epaimahai gaztearen iritziz.
Bergarako kultura etxeko ganbaran egin den sari banaketa ekitaldian, irabazle guztiek euren gutuna irakurri diete bertaratu direnei. Sari nagusiaren irabazleak ezin izan du ekitaldira joan, baina berak idatzitakoak ere entzun ahal izan dira grabazio bati esker. Irabazleak, gainera, ondo lagunduta egon dira, izan ere Bergarako Musika Eskolako soka taldeak girotu du ekitaldia.
Ezkerretik eskuinera: Leire Urretabizkaia, Maddi Elortza eta Fernando Anbustegi.
