Orain arteko eztabaida-prozesua zapatuko aurkezpenarekin amaitutzat eman zuten eta orain helburua izango da jendartera heltzea: "Gure mezua, gure helburuak eta gure proposamen politikoa jendartera heltzea gura dugu eta aproposa iruditu zitzaigun hori jai baten bidez egitea", dio Durangaldeko kide Markel Ganboak.
Herrietatik abiatu
Sexu askapena nola ulertzen duten ere gaineratu du Ganboak: "Jende askok pentsatzen du gay eta lesbianen mugimendua dela, baina ez da horrela. Sexua duen pertsona oro bildu gura dugu, jendartea askatu. Ez da kasualitatea Bergaran aurkeztea, hiriburuetatik kanpo joatea gura genuen eta herrietara heldu. Herriek hartuko dute protagonismoa, eskualdeetatik irekiko dugu mugimendua".
Beraz, homosexualen bizi-kalitatea hobetzeko nahiaz harago, antolakunde berriak "gizarte osoaren askapen prozesua" bultzatu gura du, "hetero-patriarkatuaren kontrako borrokan proiektu politiko ausarta garatzearen beharra" ikusita.
