Lantegi sarrerako ateari giltzarrapoa jarri eta 20 bat erruberari su eman diote gaur Candy enpresako langileek. Barrutik jaso dute albistea bi orduz itxaroten egon ostean: zuzendaritzak ez du inolako eskaintzarik egin.
Handik gutxira irten dira enpresa komiteko ordezkariak, eta Ramon Romerok –enpresa komiteko presidentea eta ESK sindikatuko kidea– egin die langileei bileran gertatutakoaren laburpena. "Atzoko bileraren ostean pentsatzen genuen zuzendaritzak, gaur, komitearen eskaeretara gerturatzen den proposamen bat ekarriko zuela, baina horren ordez burla egi digute, berriz. Arratsaldean berriz elkartuko gara zuzendaritzaren. Gaur ez bagara adostasun batera heltzen… bukatu da kontu hau".
Hala, emaitzarik gabeko beste bilera bat izan da gaur goizekoa, eta etorkizuna arriskuan ikusten duten langileen etsipenari nekea ere sumatzen zaie. Kezka handia da.
Atzo, manifestazioa
San Martin plazatik abiatu zen, atzo, manifestazioa. Eta jendetsua izan zen. Candy-ko langileak eskertuta daude herriak erakutsitako elkartasunarengatik. Antolatutako mobilizazio guztietan sumatu dutela diote.
Irtenbidea, ordea, beste batzuen eskuetatik pasatzen da. Romerok azaldutakoaren arabera zuzendaritzak atzo proposamen bat egin zien, guztiz onartezina langileendako. Eta komiteak kontra-proposamena egin zuen. Candy itxiko badute garesti ateratzea nahi dute ordezkariek, eta negoziazio horretan dihardute. Adostutako irtenbiderik topatzen ez badute, epaitegietara jotzea da hurrengo pausoa.
Hilaren 30ean bi hilabete beteko dira Candy lantegiko 150 langile ezjakintasun egoera honetan daudela.