Aurtengo kontuak ikusita, enpresako langileek hilabeteroko kontuak eskatu dizkiote zuzendaritzari eta kontu horiek ez dituztela erantzun diete. "Guretzat hori adar-jotze bat da. Arraroa da halako multinazional batek hileroko konturik ez egitea", adierazi du Jesus Markezek, LABeko ordezkariak.
Zuzendaritzak proposamen bat egin die: diru kopuru handiagoa emango diete eta bost lanpostu mantenduko dituzte Bergaran. Baina proposamen horrekin ez dira ados agertu eta enpresa Txinara eramatea "erabaki politikoa" dela gaineratu du Markezek.
Mobilizazio gehiago
Bestalde, datorren asteartean, abenduaren 9an, kontzentrazioa egingo dute Bergarako plazan, sindikatuen, eragile sozialen eta talde politikoen atxikimendua jasotzen ari direlako. Horretaz gainera, eguenean manifestazioa egingo dute euren eskubideen alde, Bergaran, 18:30ean. Egubakoitzean berriro batzartuko dira langileriaren ordezkariak zuzendaritzakoekin, baina, printzipioz, mobilizazioekin jarraituko dutela azaldu dute.