Emakumeen aurkako 65 indarkeria kasu artatu dituzte 2014an Bergaran

Urtea hasi zenetik, udal zerbitzuek eta Ertzaintzak jasotako emakumeen aurkako indarkeria kasuak 65 direla jakinarazi du Bergarako Udalak. Izan ere, azaroaren 25a dela eta, txostena kaleratu du, herriko emakumeen aurkako indarkeriaren datuak bilduz. Kasu gehienak bikotekideak edo bikotekide ohiak eragindakoak izan dira, eta emakume gazteenganakoak (18-30 urte artekoenganakoak, %44). Horrez gain, argitaratu dute, gizarte zerbitzuen arabera, gehienetan indarkeria psikologikoa izan dela, kasuen %58a, hain zuzen. Indarkeria fisikoko erasoak, berriz, kasuen %38tan gertatu dira, eta erasorik ezohikoena ekonomikoa izan da, kasuen %4a.

Aipagarria da, baita ere, erasotzaileen gehiengo zabala EAEkoa zela, %64a, hain justu.
Edonola ere, Emakumeen Kontrako Indarkeriaren Aurkako Nazioarteko Egunean, bergararrek ezezkoa eman zioten indarkeria mota horri, eta zenbait ekintza izan dira herrian azken egunotan.

Herritarren erantzuna

Antzerki eta film emanaldiekin, Beldur Barik lehiaketan parte hartuz, mural bat margotuz eta hainbat kolektiboren hausnarketen bidez argi erakutsi zuten bergararrek emakumeenganako indarkeriaren kontra daudela.

Ezin da ahaztu, ezta ere, hezkuntza sektoreak egindako lanketa. Besteak beste, Ipintza institutukoek elkarretaratzea egin zuten azaroaren 25ean. Hori bakarrik ez, gaur bertan, herriko eskoletako DBH 4.mailakoek Jokoaut antzezlana izango dute aztergai. Obrak gazteen arteko indarkeria du hizpide, eta eztabaida irekitzea helburu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.