Lehiaketan parte hartzeko oinarri guztiak, pasa den asteleheneko alean iragarri genituen eta jardun.org atarian ere ikusgai daude.
Dagoeneko irekita dago lanak aurkezteko epea eta 2015eko urtarrilaren 7an itxiko da. Sari banaketa, aldiz, San Valentin bezperan, otsailaren 13an izango da, kultura etxean, 19:00etan.
Gaiaren originaltasuna
Jardun-etik azaldu dutenez, gaiaren orijinaltasuna asko baloratuko da: azken urteetan jasotako gutunen artean oso gai bitxiak jaso dituzte. Ohikoena, norbaitekiko maitasuna adieraztea da; beste askotan zerbaitekiko maitasuna ere agertu izan dute gutunek (tabakoarenganako maitasuna, adibidez)
Lau sari egongo dira: bi lan onenek 500 eta 250 euroko saria jasoko dituzte, bergarar onenarendako 150 euro izango dira eta 26 urtetik beherakoendako gutun onenak beste 150 eroango ditu.
Epaimahai berezia izango da: Maite Toledo idazlea, Fran Urias Hesian taldeko abeslaria, Urko Egaña bertsolaria eta iazko edizioko irabazlea, Amaia Artola; gazteen sarirako aldiz, Bergarako ikastetxeetako ikaslez osatutako epaimahaia izango da.
Normalean erantzun oso ona jasotzen dutela esan dute Jardungoek: Euskal Herriko leku askotatik jasotzen dituzte gutunak, baita kanpotik ere.