Liztor beltzaren habi bat kendu dute Bergaran Iparragirre kaleko zuhaitz batetik

Suhiltzaileak habia kentzen.

Domeka iluntzean suhiltzaileak Bergaran ibili dira. Iparragirre kaleko zuhaitz batean liztor beltzaren habi bat zegoela ohartarazi dien dei baten ostean bertaratu dira. Lanak konplexuak izan arren, arazo gabe kendu dute vespa velutinaren habia.

Normalean habiak gauean kentzen dituzten arren, lanok zuten konplexutasuna medio, 19:00ak inguru bertaratu dira Oñatiko suhiltzaileak: "Autoeskala erabili behar izan dugu, eta habira iristeko zuhaitzeko adar batzuk moztu behar zirenez ohi baino lehenago joan gara", dio suhiltzaile batek.

"Habiari intsektizida bota diogu, eta liztor guztiak hilda zeudela ikusi eta gero jaitsi dugu, horren ostean habia kamioan sartu eta suhiltzaile-parkean erretzeko", dio Oñatiko suhiltzaile batek. Habia kentzen zuten bitartean, jende asko gerturatu da zer gertatzen zen ikustera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.