Kontsumo iraunkorraren Ekobira feriak plaza beteko du bihar

Familia bakoitzak tuper bana jasoko du.

Kutxa Ekoguneak Bergarako Udalarekin batera antolatzen duen Ekobira kontsumo iraunkorraren azoka ibiltaria herrian izango da bihar. Ekobirak herritarren eskura jarriko ditu ingurumenean eragin edo inpaktu txikiagoa duten produktu eta zerbitzu ekologikoak kontsumitzeko aukerak.

Feria San Martin plazan izango da goizez eta arratsaldez, 10:30etik 14:30era eta 16:30etik 19:30era. Azokara joaten direnek beste kontsumo era bat posible dela egiaztatuko dute.

Postu jasangarriak

Biharko Ekobira feriak erakutsi nahi du bizimodu iraunkor edo jasangarria egiteko aukera ugari daudela, bai elikadura alorrean, baita energia-kontsumoan, erosketetan eta aisialdian ere.

Hain zuzen, nekazaritza ekologikoa eta mugikortasuna lantzen dituzten postuak egongo dira.

Tuperrak doan

Etxe bakoitzeko tuper bat emango da. Tuperra etxera eroan nahi dutenek udaletxeko arkupeetan artxibo aldera egongo den gunetik pasatu beharko dute. Han egongo diren udal langileek pertsona hori erroldan dagoela egiaztatu ostean, tuperra emango diote. Bada, kontuan izan behar da etxe bakoitzeko tuper bat banatuko dela.

Tuperrak erosketak egitera bideratuta daude; hala, erosketak egitean erabiltzen diren paper eta plastikoak saihesten dira, eta hondakinak murriztu.  Etxeetarako ere zenbait abantaila dituzte: garbitasuna, usainik eza...

Herriko hamazazpi dendarik bat egin dute ekimenarekin, eta euren komertzioetan gustuz zerbitzatuko dute tuperretan. Ontzien kontsumoa zabaltzeko, tuper premia daukanari ontzi berriak ere lagako dizkiote, garbi bueltatzeko baldintzarekin.

Dendariek erosketa egiteko modu berritzaile hori sustatzeko, urte erdiz, hilero 20 euroko bonu baten zozketa egingo dute bezeroen artean, saridunak nahi dituen produktuak eros ditzan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.