Etxe bakoitzeko tupper bat banatuko da eta horretarako nahikoa izango da udal arkupeetan artxibo aldera egongo den mahaitik pasatu eta Bergaran erroldatuta egotea akreditatzea. Udal langileak konprobatuko dute errolda eta tupperra entregatu, kontutan izanik etxe bakoitzeko tupper bana banatuko dela.
Erosketak tupperrarekin egiteko
Ontziratu Zaitez! deitu zaio kanpainari, eta banatuko diren tupper hauek erosketak egitera bideratuta daude, horrela okela, arraina edo beste erosterakoan batzerako erabiltzen diren paper eta plastikoak saihesten dira eta hondakinak murriztu. Etxeetarako ere zenbait abantaila izanik, antolaketa, garbitasuna, usain eza etab.
Kanpaina bultzatzeko herriko 17 dendari prest azaldu dira eta euren komertzioetan gustura zerbitzatuko dute tupperretan. Gainera, bezero berezia izanez gero, premia daukanari tupperrak laga ere egingo dizkiete garbi bueltatzeko baldintzarekin. Lagatzeko tupperrak kolore berdekoak dira, etxeetarakoak berriz urdinak.
Dendariek eurek, hilero 20 euroko zozketa egingo dute bere bezeroen artean, saltokian bertan nahi dena erosteko. Zozketa horiek hilean behin egingo dira, sei hilebetetez.
Guztira 3000 tupper banatuko dira. Kutxaren Ekogunearen ekimena da ekintza hau, Ekobira azokarekin batera, eta Udalaren laguntza du.