Garbi Losada zuzendariaren eskutik bihurtu zen euskarazko antzezlan Fernando Castets eta Juan José Campanellak zinemarako idatzitako gidoia. Laskurainek azaldu duenez, proiektuarekin hasi zirenetik planteatzen zen gerora antzezlana gaztelerara egokitzeko aukera, eta izandako arrakasta ikusita, aukera hura gauzatzea erabaki zuten.
Laskurain eta Sara Cózar berriro ere elkarrekin arituko dira oholtza gainean, baina, oraingoan, aktore zerrenda berriarekin datorkigu El Hijo de la Novia. Izan ere, Juanjo Artero, Álvaro de Luna eta Tina Sainz izango dira lan taldean.
Dagoeneko hainbat entsegu egin dituzte, eta Laskurainen hitzetan, "lantalde polita" osatu dute. "Hankak lurrean, baina esperantzarekin" begiratzen dio Laskurainek datorren urte terdiari, Artero, De Luna eta Sainz kartel buru izanda Espainian zehar oihartzuna lortzea errazagoa izango delakoan.
Estreinaldia Bilbon izateak, gainera, ilusioz betetzen du Laskurain, halako une erabakigarrian familiakoen eta lagunen babesa izango duelako.
Drama eta umorea
Istorioak drama eta komedia nahasten ditu eta ikuslea barre algaratik negargurara gidatzen du txandaka. Oholtza gaineko pasarteak egunerokotasunean oinarritzen dira, eta edonori gertatzeko modukoak izateak bihurtzen du antzezlana hain gertuko ikuslearentzat. Gurasoen ezkontza, emaztegaiaren memoria galera eta familia-jatetxearen gainbehera dituzte oinarri gertakizunek.