Eguaztenean, pailazoak
Bergarar gazteenek irudimena dantzan jartzeko eta ikuskizunean parte hartzeko aukera izango dute Potxin eta Patxin pailazoen eskutik. Aurten aurkeztu duten Oihan Koloretsua ikuskizuna antzeztuko dute Munibe plazan, arratsaldeko zazpietan.
Eguenean, erritmoa
Bergarako kaleak erritmoz eta doinu biziz beteko ditu Turukutupa taldearen Rezikletas kale ikuskizunak. Taldeko aktore-musikariek perkusioan oinarritutako kontzertu ibiltaria eskainiko dute arratsaldeko zortzietan, San Martin plazatik hasita. Ikuskizunak, musikaz gain, istorio bat ere badu oinarri, eta ikuslea inplikatzea du helburu. Gainera, ikuskizunaren izenari men eginez, erabiltzen dituzten instrumentu eta tramankulu guztiak birziklatutako edo berrerabilitako materialez osatuta daude.
Egubakoitzetan, kontzertuak
Aritzeta abesbatzaren kontzertuak emango dio hasiera 19:45ean egubakoitzeko musika eskaintzari. Kontzertua Santa Marina elizan izango da, bertako jai egunaren aitzakian, eta, urtero legez, Aritzetako ahotsek ez dute hutsik egingo. Gainera, uztaileko egubakoitzeroko ohiturari jarraituz, urtez urte indartuz doan Berumuga zikloak musika beltzaren erritmoak ekarriko ditu Espoloira. Gaueko hamarretan Travellin' Brothers taldea izango da oholtza gainean, ohikoa duten blues estiloa mantenduz, baina swing eta jazz ukitu berriekin.
Musika zaleek, beraz, gustu guztietarako doinuak izango dituzte entzungai astean zehar, eta Bergarako kaleetan ez da erritmorik faltako.