Zapatu gauean auzo afaria egin zuten. Nagusienak elizaren goialdean dagoen elkartean batu ziren, 15 bat lagun. Eliza aurreko belardian aldiz, gazteenak, 20 bat lagun. "Langostinoak ditugu jateko", zioen pozik Gari Garitano auzotarrak. Giro ezin hobean, Unsain musika taldearen trikiti doinuekin lagunduta erromerian gozatu zuten afal ostea.
Tolosako taldearen aurretik baina, urdaiazpiko pare baten zozketa ere egin zuten algara artean. "Trikiti doinuak bukatzean agrofesta egingo dugu. Guk jarriko dugu musika ordenagailu batekin goizaldera arte", zioen auzoko Dj lanak egin zituenak.
Meza eta herriko kirolak
Domekan meza izan dute eguerdian auzotarrek. Ondoren, auzoko erretiratuendako luntxa banatu dute. Herri kirolendako tartea ere izan da Ernesto Bihurri-ren erakustaldiarekin batera.
Bergarako trikiti eskolako gazteen emanaldiak bukaera polita eman die aurtengo jaiei San Kristobalen.