18 bat gaztetxo elkartu eta musika eskolaren umeen abesbatzaren eta Orfeoi Gazte taldearen arteko zubi lana egitea izan zen zapatuko saioko helburua. Hala, gaztetxoak Orfeoi gaztean parte hartzera animatu eta, aldi berean, Orfeoirako harrobi lanak egiten dituen taldea elikatzen joatea bilatzen da musika eskolaren eta Orfeoiaren arteko kolaborazio honekin, eten baten ostean azken bi urteotan egin izan den bezala.
Saio bereziak hiru zati izan zituen. Lehenik Orfeoi gazteak saioa egin zuen, ostean musika eskolakoak batu zitzaizkien eta azkenik Orfeoiko nagusiek ere hartu zuten parte. Bukatzeko, kontzertua egin zuten Santa Marina parrokian.
Orkestra, egubakoitzean
Bergarako beste parrokian, San Pedron, goi-mailako musikarekin hitzordua egubakoitzean izan zen Bergarako Orkestra Sinfonikoak emanaldia egin baitzuen elizan bertan, joandakoen gozamenerako. Ohi bezala, Alfedro Gonzalez Chirlaqueren gidaritzapean egin zuten kontzertua. Bete egin zen eliza egubakoitzekoan.