Behi suharren erakustaldia eta lehiaketa egin dituzte asteburuan Bergarako zezen plazan. Seminarioan jarritako plaza errekortariak ikusteko gogotsu zeuden ganaduzaleek bete zuten. Susto pare bat egon baziren ere, ez zen arazo larririk egon eta egun paregabea pasatu zuten errekortari eta ganaduzaleak.
Paleta izeneko behia izan zen domekan Bergarako Seminarioan jarritako zezen plazara salto egin zuen lehenengo behia. Egun osoko festa prestatu zuten bergarako ganaduzaleek, eta behi suharren erakusketak ikusmin handia piztu zuen. Askotariko ekintzak antolatu zituzten, eta eguneko protagonistak behi suharrez gain, errekortariak izan ziren.