Reyes Azkoitiak, Bergarako pilota entrenatzaileak, izan du jaien hasierako txupina botatzeko ohorea aurten, eta halaxe egin zuen atzo, irribarrea ahotan, ia ailegatu ezin-eta suziria pizteko aulki batera igo behar izan bazen ere. Tradizioari jarraiki, bolaua urarekin edan, eta jai zoriontsuak opa zizkien bergarar guztiei.
Txupinazoaren ondotik, goitik behera abiatu zen Bitorianatxo eta, jaitsiera burututa, hark ere egin nahi izan zituen hitz batzuk: krisiaren ondorioz-edo, blusa asko errepikatuta ikusten zituela esan zuen, baina ez diola inporta, garrantzitsuena ondo pasatzea delako.
Jendez eta kolorez beteta zegoen Bergarako San Martin Agirre plaza ordurako, eta are gehiago koloreztatu zen Reyes Azkoitiaren laguntzaile txikiek, hau da, pilota eskolako umeek, baloiak eta serpentinak bota zituztenean udaletxeko balkoitik.
Jendetza herrian barrena zabaldu zen ostean eta festa nagusi da orduz geroztik.
Gaur goiza ere badoa jai itsura hartzen, apurka-apurka: udaletxeko arkupeei bakailao usaina darie, esate baterako.
