Aitor Arregik (Bergara, 1990) ospakizunetan eman du astea; Eibarko taldeaz Lehenengo Mailara igo da, eta jaia barru-barrutik bizitzen dabil; joan den astean Lugoren kontrako garaipenean 90 minutuak jokatu zituen Ipuruan. Eta, epaileak partiduaren amaiera adierazi zuenean Eibarko jai eroan murgildu zen bera ere. Azken asteotan iritsi zaio orain arte izan ez duen protagonismoa, berdegunekoa, jokalariek gehien amesten duten hori.
Baina, joan den astean Goienari aitortu moduan, ez dira igoeraz konformatzen, txapeldun izan nahi dute: "Ez dugu bigarren postua sinatzen". Pauso batera dute balentria hori, eta asteburuan Numantziari irabazi egin beharko diote horretarako. Aurrerago egongo da astia etorkizunaz arduratzeko.
Rezusta, finalaren zain
Beñat Rezusta (Bergara, 1993) sekulako denboraldia egiten dabil. Lehenengoa du Aspeko pilotari moduan, eta konturatu orduko, urteko bigarren finalaren atarian da. Finalera bidea, baina, partiduz partidu egiten da, eta horietako askotan erakutsi du kontrarioak goitik behera menderatzeko gauza dela, bai ezker eskuaz pilotari ematen dion moduagatik, edo baita kantxatik mugitzeko duen azkartasunagatik.
Rezustak Arregik baino astebete gehiago itxaron beharko du ospakizunetan murgiltzeko. Lehenago, baina, Ibai Zabala izango du zain, finalean.
