Zabaleta eta Cestafe bergararrak garaile Aiako igoeran

Zapatuan egin zen Aiako igoeraren zazpigarren edizioa. Aitor Zabaletak irabazi zuen jarleku bakarreko ibilgailuen kategoriako lasterketa, eta Markel Cestafe izan zen garaile autoen kategorian. Euskadiko Mendi Txapelketako hirugarren proba ere izan zen lasterketa, eta Lagun Artea taldeak antolatu zuen.

Andatza Auzotik abiatu ziren, eta Aiako sarrera izan zen helmuga. Eguraldia ez zuten lagun izan, eta errepidea bustirik egon zen lehendabiziko bi itzulietan; azken bietarako lehortu zen. Hala ere, zorua ez zegoen egoera onenean, hezetasuna zela eta.

Aiako igoerako marka propioa gainditzetik lau hamarrenera gelditu zen Aitor Zabaleta, Lola BMW autoarekin. Bigarren postua lehiatua egon zen, Arkaitz Ordoki eta Joseba Iraolaren artean. Azkenik, Ordokirentzat izan zen. Bestalde, autoen kategorian Markel Cestafe izan zen garaile, Mitsubishi EVO VI autoarekin.

Lasterketa ezbeharrik gabe egin zen, gertakari bakarra David Pelaezek izandako istripua izan zen. Laugarren itzulian errepidetik irten zen, eta, ondorioz, lasterketa gelditu behar izan zuten, eta  errepideko olio arrastoak garbitu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.