"Orain arte gunea edozeinek erabil zezakeen, eta, araudi honekin, bere mantenu egokia ziurtatzeaz gain, erabiltzaileen segurtasuna ere bermatu nahi dugu", dio Lauri Askargortak, Kirol zinegotziak.
Horretarako, Udalak boulderra dagoen gunea itxi egingo du, kiroldegiko beste guneetatik bereiztuta utzita. Gunea erabili nahi duten erabiltzaileek kiroldegiko tabernan eskatu beharko dute bertako giltza.
Nork eta nola erabili?
Labegaraietako kiroldegiko boulderrera sarrera libre izango dute, Agorrosingo kirolguneko abonua indarrean dutenez gain, eguneroko sarrera ordaintzen dutenek eta Pol-Poleko eskalatzaile txartela dutenek.
Eskalatzaile txartela Pol-Polen lor daiteke; horretarako, baina, Mendi Federazioan lizentzia egunean izateaz gain, txartelaren kuota ere ordaindu behar da.
Udalak eta Pol-Polek sinatutako akordio horretan, boulderra egoera onean mantentzeko, finantzatutako inbertsio programa bat ere ageri da.
