Belcebluesek gaztetxoentzako kontzertu didaktikoa eskainiko du

Bergarako Belceblues taldeak, Memphisen (AEB) Munduko Blues Txapelketan final-laurdenetara iritsi ostean eta estudioko hirugarren diskoa prestatzen ari den bitartean, kontzertu didaktikoak egiten ditu han-hemenka.

Domekan (18:00) Zabalotegi aretoan egingo duten emanaldi didaktikoan, bluesaren sorrera eta jatorria azalduko diete gerturatzen diren gaztetxo eta guraso guztiei. "Kontzertu didaktiko honek duen ezaugarririk nabarmenena da helduentzako zein gaztetxoenentzako dela egokia. Mundu guztiak gozatuko du", azaldu du taldeko bateria-jotzaile Oihan Vegak.

Mota horretako emanaldietan eskarmentu handiko taldea da Belceblues, eta domekan, gozagarria bezain hezitzailea izango den kontzertua eskainiko dute.

Bluesaren ibilbidea

Emanaldi didaktikoan, AEBetako esklabo beltzetatik hasi eta egungo blues elektrikora iritsi arteko ibilbidea egingo dute, bideodibertigarri, adibide erakargarri, bitxikeria ikaragarriekin eta jokoekin. Hori guztia, zuzeneko musikarekin batuta.

Bluesaren erritmoak gure musika eta kulturarekin dituen antzekotasun eta ezberdintasunak ere azaltzen dituzte emanaldi berezi horretan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.