Ondo hasi du Bergarak Herri Arteko Pilota Txapelketa. Joan den egubakoitzean izan zen lehen jardunaldia, eta hiru kategorietatik bitan Errenteria garaitzea lortu zuen Bergarak. Kadeteek eta nagusiek 22-8 eta 22-2 irabazi zuten, hurrenez hurren. Gazte mailakoek, berriz, ezin izan zituzten errenteriarrak mendean hartu eta 22-18 galdu zuten.
Bihar, zapatua, jokatuko dira itzulerako partiduak, eta aurrera egiteko aukera ederra dute etxekoek. Herrietako klubentzat dagoen txapelketa garrantzitsuena da hori.
Bergara Hiria eta Deba Arroa
Bestetik, Bergara Hiria txapelketako partiduak jokatu ziren martitzenean, 19:30ean. Nagusien kategorian, Santxo-Urrusola bikoteak 17an utzi zituzten Dario eta Peñas. Promesetan, berriz, Espinalek eta Sarasak 22-12 irabazi zieten Elordiri eta Etxeberriari. Garaipen horiekin, txapelketako finalerdietan daude dagoeneko bikote irabazleak. Deba Arroa txapelketako lehiak ere izan ziren eguaztenean. Kadeteek eta nagusiek ez zuten zorterik izan eta galdu egin zuten partidua; gazteek, aldiz, Soraluze mendean hartu zuten.
