Astelehenean irekiko dute Bergarako udalekuetako izen-ematea

Joan den udan gazte mordoak hartu zuen parte udalekuetan.
Uda garaia gero eta gertuago dago, eta nagusien buruetan oporrak ageri diren arren, etxeko txikiek udalekuak noiz hasiko diren zain daude. Urtero moduan, Udalak udaleku irekiak antolatu ditu ekainaren 30etik uztailaren 18ra, 10:00etatik 13:00era, 2002-2011 urte bitartean jaiotako eta Bergaran erroldatutako umeentzako.

Ekintza gehienak herrian bertan egingo dituzten arren, ez dute aspertzeko astirik izango. Herriko kale eta plazak gazteen jolasleku bihurtuko dira, eta, euskara tresna bezala erabilita, herria ezagutu eta ederto pasatzeko aukera ugari izango dituzte.

Izena nola eman

Udaleku irekietan izena emateko epea astelehenean ireki eta maiatzaren 23an amaituko da. Prozesu hori errazteko, gainera, bi modutan eman daiteke izena. Nahi duten gurasoek astelehenetik egubakoitzera 09:00etatik 21:00etara kultura etxera gerturatu besterik ez dute. Bertan, izen-emate orriarekin batera, bankuko ziurtagiria ere eraman da. Teknologia berrietan iaioagoak diren gurasoek www.bergara.net webguneko Udaleku irekiak atalean topatuko dituzte izena emateko prozedura eta eskakizun guztiak.

Ordainketa Laboral Kutxaren 3035 0009 16 0090900017 zenbakian edo Kutxabanken 2095 5070 71 1062071534 zenbakian egin behar da haurraren izen-abizenen ostean Udalekuak hitza jarrita. Izena ematen duten seme-alaba kopuruaren araberakoak izango dira kuotak. Lehenengoa: 50,50 euro, bigarrena: 45,45 euro; hirugarrena eta hurrengokoak, doan.

Eskaintzen diren plazak baino eskaera gehiago badaude, zozketa egingo da. Horrez gain, ekainaren 17an, 18:30ean, Zabalotegi aretoan bilera bat egingo da guraso guztientzat.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.