Enrike Jauregi eta Miren Aierbe bergararrak etxean dira berriz ere. 17 urte pasa erbestean eta Iparraldean egin ondoren, aurreko aste bukaera ezkero Bergaran dira biak. Domekan, harrera beroa egin zieten hainbat herritarrek, senide eta lagunak tartean.
Albo banatan jendea txaloka zutela iritsi ziren Jauregi eta Aierbe Arrano taberna parera. Besarkadak eta muxuak batean eta bestean, eta aurreskuaren ondoren bi hitz ere egin zituzten.
Iazko ekainean Miarritzen egindako ekitaldi jendetsuan iradokitako bidetik, eta Altsasun iheslari ohiek berriki egindako agerraldian berretsi legez, iheslariak egunotan hasi dira euren herrietara itzultzen. Guztira, munduan barreiatuta, 500 iheslari inguru daudela kalkulatzen dute, horietatik 100 Iparraldean, hauetako 10 bat debagoiendarrak. Batzuk itzuli dira eta beste batzuek gauza bera egingo dute datozen egunetan.
