Helduentzako 'Coser y cantar' ipuin musikatua

Imanol Gallego 2014ko mar. 21a, 16:13
'Coser y cantar' kontakizun musikatua.
Ipuinak ez dira ume kontuak, eta Bergaran urte hasieran ekin zioten esaldi hori gertutik frogatzeari. Hileko azken martitzenetan helduentzako ipuin kontaketa saioak egingo dituzte, eta ekimenak oso erantzun ona izan du; bada, antolatzaileak ezustean harrapatu ditu horrek.

Martitzen honetako hitzordua, baina, berezia izango da: "Ohituta gauden kontakizun bat izan beharrean, musikarekin alaitutako antzerki-jolas bat izango da", azaldu du Virginia Imaz antolatzaileak. Bertaratzen direnak gaztetuta irtengo dira, haurtzaroko kontakizunak berpizteaz gain gaztetako jolasak ere ekarriko dituzte-eta gogora.

Ainhoa Limon ipuin kontalariak Juan Gutierrez musikariaren laguntzarekin antzerki parte hartzailea den Coser y cantar kontakizuna taularatuko dute osoko bilkuren aretoan (19:00). Bertan, memoriaren gaia hari bezala erabilita, 30 urtetik gorakoen haurtzaroko elementu ugari berreskuratuko dituzte, kontakizuna jolas tradizionaletan oinarritzen da-eta.

Korroa, pasilloa, palmak eta halako jolas tradizionalak, batetik, eta Anis botila, zartagin, koilara eta bieira bat, bestetik, heldu askoren haurtzaroaren soinu banda berregingo dute. Martitzenekoa ipuinen bitartez haurtzarora bueltatzeko gonbidapen berezi bat da.

Gazteak egubakoitzean

Zu eta ni izenburupean Dorleta Kortazarren haurrentzako ipuin kontaketa saioa izango da egubakoitzean Udal Liburutegian; 18:00etan 3-5 urte bitartekoentzat eta 18:30ean 5 urtetik gorakoentzat. Helduen saioak bezala, horiek ere doakoak izango dira.

Gogoan izan behar da ipuin kontakizunak ez direla martxoan bakarrik izango. Gazte zein heldu, anima zaitezte fantasiaren leihoa zabaltzera!

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak