Bergara erdialdeko etxebizitza batean izan zen gertaera, 19:30 inguruan. Ertzaintzak jasotako salaketaren arabera, etxebizitza horretan zegoen biktima –hainbat senitarteko bizi ziren bertan– bere bikotekide ohia hitz egiteko asmoz bertaratu zenean.
Salaketak jasotzen duenez, sukaldera joan ziren biak, eztabaida piztu zen bertan eta gizonezkoak emakumezkoa iraindu eta mehatxatu egin zuen, esku batekin helduz; 30 zentimetroko aizto bat ipini zion lepoan.
Ertzaintzatik helarazitako informazioaren arabera, etxebizitzan zeuden beste bi gizonezkoren esku-hartzeari esker, ustezko erasotzaileak aiztoa utzi zuen, eta euren arteko liskarra izan zen ostean. Ertzainek gertakariaren berri jaso zuten orduan eta etxebizitzara joan ziren, ustezko erasotzailea atxilo hartuz. 37 urte ditu eta genero indarkeria delitu bat egin izana egozten diote.
