Guztira, 23 herrialdetako 219 galeria daude Ifema erakustazokan, iaz baino gehiago, baina artista kopurua jaistearen alde egin dute antolatzaileek, bisitariek lasaiago egin dezaten bisita. Eta hogeita hamahirugarrenak badu beste berezitasun bat ere: beste edizio batzuetan argazkigintza izan bada ere nagusi, oraingoan pinturak egin du gora galerien eskaintzan.
Euskal presentzia
Beste behin, bi euskal galeria izango dira Arcon, urte onenetan baino gutxiago: Altxerri donostiarra eta Carreras Mugica bilbotarra. Lehenak Selena Asins, Ignacio Uriarte, Jose Maria Yturralde eta Dicky Rekalde artisten lanak eraman ditu. Bilbotarrek, berriz, Txomin Badiola, Eduardo Chillida, Pello Irazu, Erlea Maneros Zabala, Asier Mendizabal, Itziar Okariz, Juan Perez Agirregoikoa, Xabier Salaberria, Richard Serra eta Jessica Stockholder artistek egindakoak jarriko dituzte balizko erosleen begi-bistan.
Muniategiandikoetxea
Espacio Minimo arte galeriarekin joan da Manu Muniategiandikoetxea. Jatorriz murtziarra den galeriak Bergarakoaren eskulturak erakutsiko ditu, Liliana Porter eta Susan Collis artisten lanekin batera; Muniategiandikoetxearen obrekin osatutakoa izango da euren erakustokiko atalik "formalena".
