Mbaye Ndiaye gogoan, kulturartekotasunari gorazarre egin zioten Soraluzeko antzokian egubakoitzean

Orain urtebete hil zen Mbaye Ndaye senegaldarra, gogoratu zuten Soraluzeko elkartasun batzordeak eta Ndank Ndank elkarteak egubakoitzean. Eibarren bizi zen kale-saltzailea oso ezaguna zen gure ibarrean.

Astean Ceutan hil ziren 13 pertsonak gogoratuz hasi zuten jaialdia. "Azken urtebetean Mbayren familiari laguntzeko hilero egiten dugun diru bidalketaren berri eman genuen gero eta ondoren, senegaldarren musika tradizionalaz gozatzeko aukera izan genuen bertaratu ginen hirurogeiren bat lagunek" azaldu du Egoitz Unamunok, Soraluzeko elkartasun batzordeko kideak.

Kontzertua eta afaria

Eneko Larrañaga zestoarrak zuzentzen duen Enekora taldeak Kora Izpiak izeneko diskoan jasotako hamarren bat kantu jo zituen, Afrika eta Hego Ameriketako irudien proiekzioekin ilustratuta. Ordubete inguruko kontzertu hunkigarria izan zen, besteak beste, arparen estilokoa den kora instrumentu afrikar tradizionalaren doinuekin.

Emanaldiaren ondoren, antzokian bertan, arroza eta oilaskoa osagai dituen Yassa jaki senegaldarra janez eman zioten amaiera afrikarrak eta euskaldunak elkartu zituen jaialdiari.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.