Bergarako Erraldoi Taldeak topaketa egin du gaur Zabalotegiko pilotalekuan: "Irailetik ez gara talde osoa elkartu eta urte berriko irteerak Aratusteekin hasten ditugunez, erraldoien lehen kontaktu bat izan da gaurkoa. Haurrendako entsegua egin dugu eta gero erraldoiak desmuntatu ditugu, arropa guztiak garbitzera eramateko. Aratusteetarako guztiak elegante jarriko ditugu", adierazi du taldeko partaide Ibon Unamunok.
Haurrei zuzendutako topaketa izan da gaurkoa bereziki. Iaz lehen aldiz egin zuten deialdia eta haur batzuk eman zuten izena. Hala ere, Unamunok dioenez, haur txikiak "datoz eta doaz": "Ez dira modu finkoan etortzen. Horregatik aurten ere deialdia egin dugu; iazko batzuk etorri dira eta baita jende berria. Gero eta jende gehiago, hobeto". Jarraian gaurko topaketako zenbait argazki.
