Eskulanak egiten eta dantzan aritu ziren atzo txikienak

Umeak eskulanak egiten atzo, eguena, Aranzadiko gimnasioan.
Udalak antolatutako 3 urtetik gorako umeendako tailerren lehen eguna izan zen atzo. Gaur, egubakoitza, eta bihar, zapatua, beste bi egingo dira, 17:00etatik 19:00etara, Aranzadiko gimnasioan. Atzo, esaterako, dantzan, margotzen eta eskulanetan aritu ziren.

Horrekin batera, esperimentuak egiteko aukera ere izango dute joaten diren gaztetxoek eta baita ipuinak entzutekoa ere.

Dena den, Udalak umeendako antolatu dituen ekintzak haratago doz. Gabonetako jolas-parkea ere egongo da urtarrilaren 2an, 3an eta 4an. Aurten gainera, bi gune bereizi egongo dira umeen adinaren arabera. 8 urtera arteko umeendako gunea Fraiskozuri Udal pilotalekuan egokituko dute eta bertan zenbait jolas, puzgarriak eta ludoteka izango dituzte, besteak beste. Bigarren gunea, 8 eta 12 urte arteko gaztetxoendako izango da eta Aranzadi Ikastolako gimnasioan egokituko dute. Hain zuzen, adin horretara egokitutako jolas eta aktibitateak egongo dira: zezen mekanikoa, Wii-a eta billarra, esaterako. Bietan ala bietan 3 euro dira eguneko sarrera eta hiru egunetarako bonoak, berriz, 7 euro balioko ditu.

Agorrosin Ekintza Gunean ere jolas egiteko aukera izango dute gaztetxoek urtarrilaren 2an eta 3an. 11:00etatik 13:00etara eta 17:00etatik 19:00etara familia guztiarendako ur jolasak egongo dira igerilekuan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.