Agertokiaren alde batean duela gutxi hildako Gonzalez Bastidaren irudi handi bat jarri zuten, bere jaiotze- eta heriotza-urteekin batera.
Oroimenerako giro horretan eta Subterra piezarekin eman zion hasiera kontzertuari Bergarako Udal Musika Bandak. Aritzeta Abesbatzaren lehen pieza Gonzalez Bastidak konposatutako Errekatxo kantari izan zen eta herritarren emozioak azaleratu zituen.
Bergarako Orkestra Sinfonikoaren emanaldiak giro biziagoa jarri zuen Udal Pilotalekuan, Mecanoren hainbat abesti interpretatu zituen-eta Ainara Ortega bakarlariarekin batera. Ondoren, dantzan ikusi genituen Bergarako Orfeoiko kideak.
Oroigarria eta 'tutti'-a
Gabonetako kontzertuan parte hartutako musikari guztiek agertokia bete zuten tutti-a interpretatzeko. Gonzalez Bastidak gogoko zituen Gabonak eta hark konposatutako Gabonetako estanpak pieza interpretatu zuten, haren seme Alfredo Gonzalez Chirlaqueren zuzendaritzapean.
Aurretik, baina, bere seme-alabek oroigarri bat jaso zuten Jaione Isazelaia alkatearen eskutik.
