Iraupen laburreko hainbat ikastaro antolatu dituzte Agorrosinen; asteon horietariko bi hasiko dira, bizkarreko minak saihestekoa bata –abenduak 2, 4, 9 eta 11,–, eta erditzeko osteko gimnasiena, bestea –abenduak 3,5, 10 eta 12.
Bakoitzak lau ordutako iraupena izango du, ordubete eskola bakoitzeko. Eta Unai Asurmendik aurtengo apustuetariko bat dela azaldu du: "Inkestei begiratuta, jendeak kirola ez egitearen arrazoietariko bat denbora falta da. Horregatik, ezagutza minimo bat jasotzeko ikastaroak antolatu ditugu, gero norberak ikusiko du zer egin".
Oinarrizko ariketak
Bi ikastaroak Junkal Zubizarretak emango ditu, kirol aholkulari zerbitzuko arduradunak. Eta bizkarreko minak ekiditeko, besteak beste, luzatze-ariketak eta irakatsiko dituztela eman dute aditzera. Bestetik, erditze osteko gimnasien harira, zoru pelbikoa eta sabeleko giharrak indartzeko ariketetan eta tekniken oinarrituko dira, ariketa hipopresiboak baliatuz, esaterako. Biak 19:30ean hasiko dira.
Eta etorkizunean irupen laburreko beste ikastaro batzuk antolatu gura dituzte: jolas tradizionalak zein txirrindularitza ardatz dutenak, esaterako.