Hainbat merkatarik adierazi dutenez, aurreko zapatuetan baino jende gehiago ibili da gaur goizean herriko kaleetan erakusleihoei begira. "Galdetzera ere sartzen da jendea", gaineratu du merkatari batek. Eta hala ikusi ahal izan dugu jendez betetako arropa-denda batean.
Tabernek ere nabaritu dute Bergara Bizi egunak bergararrak erakarri dituela eta aurrekoetan baino jende gehiago ibili da. Kanpoan, Musika Eskolako Gazte Bandak alaitu ditu herriko kaleak 12:30etik aurrera. Ikusmina sortu dute gaztetxoek eta herritar ugari batu dituzte euren inguruan.
Arratsaldean ere ekintzak
Egun osorako egitaraua prestatu dute merkatari eta tabernariek gaurko, beraz, arratsaldean ere izango da zertaz gozatu. 17:30etik 20:30era elektrotxaranga ibiliko da herrian zehar furgonetan eta horren ostean, tabernariek Bergara Bizi pintxoak emango dituzte San Martin plazan.
21:00etan bingoa eta zozketa egingo dute. Ordu berean hasiko dira DJ Eloy eta Josu musika jartzen.