Txakurren eta kirolen maitaleek ikuskizun politaz gozatu dute gaur arratsaldean Gorlan, Euskadiko Mushing txapelketan. Mushing txapelketan, korrikalariek eta txakurrek batera korritzen dute, arnes batetik lotuta; eta biharkoa egun handia izan arren, gaurkoan 13 parte hartzaileek denbora onena egiten saiatu dira. Esan bezala, Iskander Rodriguez bizikletan eta Eneko Agirre patinetan izan dira azkarrenak, eta biharko bigarren txanpa jokatu ondoren jakingo da zein den irabazlea.
Bost kilometro euripean
Euria kontran izan arren, irudi politak utzi ditu lasterketak. Bost kilometroko ibilbidea egin dute parte hartzaileek, Gorlan hasi, Hirubidetik pasatu eta Trekutz alderaino joan eta buelta. Karroz egin behar zuten karrera bertan behera geratu da ez delako parte hartzailerik aurkeztu, izan ere, egunotan Italian munduko txapelketa jokatzen ari da eta.
Bigarren txanpa eta canicross-a
Hala ere, gaurko sailkapena behin behinekoa da, bihar 9:00etan jokatuko delako bigarren txanpa. Ostean, 11:30etan, Canicross lasterketa egingo dute; bertan, bizikleta edo patinetea erabili beharrean korrika joango dira bai korrikalari baita txakurrak. Dagoeneko 60 pertsonek eman dute izena, tartean Fernando Cobos bergararra.